Sumqayit.tv xəbər verir ki, Oxu.az-ın sorğusuna cavab olaraq Sumqayıt Şəhər İcra Hakimiyyətindən bildirilib ki, şəhər ərazisində qurumuş, qəzalı, xəstəliklərə yoluxmuş ağacların götürülməsi Ekologiya və Təbii Sərvətlər Nazirliyinin Dövlət Ekoloji Ekspertiza Agentliyinin (DEEA) rəyi əsasında həyata keçirilir.

"Sözügedən ağacla bağlı da aidiyyəti üzrə müraciət olunacaq. Eyni zamanda, bildiririk ki, qeyd olunan ərazidə aqrotexniki qaydalara uyğun olaraq budanma işləri aparılıb, ağacın mövcud vəziyyəti nəzərə alınaraq təhlükəsizlik səviyyəsi təmin edilib.

Veriləcək rəy əsasında qısa müddət ərzində qanunvericiliyə uyğun olaraq müvafiq tədbirlər görüləcək", - deyə məlumatda bildirilib.

DEEA-dan isə Oxu.az-ın sorğusuna cavab olaraq bildirilib ki, yaşıllıqların götürülməsi qaydasının təsdiq edilməsi haqqında Azərbaycan Respublikası Nazirlər Kabinetinin Qərarına əsasən, qurumuş, qəzalı, xəstəliklərə yoluxmuş ağacların götürülməsi üçün vətəndaş müvafiq olaraq mülkiyyətçisi olan mərkəzi, yerli icra hakimiyyəti orqanına və ya bələdiyyəyə, onlar da öz növbəsində rəy alınması üçün DEEA-ya müraciət etməlidirlər.

"Ekspertlər tərəfindən sözügedən yaşıllıqlara yerində baxış keçirilir, ağacların quruma səbəbini müəyyən etmək məqsədilə torpaqdan nümunələr götürülərək analizlər aparılır və nəticələrə əsasən, qanunamüvafiq tədbirlər görülür.

Ağacların götürülməsinə müsbət rəy verildikdə götürülən hər bir ağacın əvəzinə yerli iqlimə xas yeni tingin əkilməsi şərti qoyulur, ağacların götürülməsi torpaq mülkiyyətçisi tərəfindən (müvafiq mərkəzi, yerli icra hakimiyyəti orqanı, bələdiyyə) təmin olunur", - deyə açıqlamada vurğulanıb.

*** 

Sumqayıt şəhərində qəzalı vəziyyətdə olan ağac sakinlərin narahatlığına səbəb olub.

Sumqayit.tv-ın məlumatına görə, şəhərin Ağa Quliyev küçəsində yerləşən ağacın aşmaq təhlükəsi olduğu bildirilir. Ərazidən həm piyadaların, həm də avtomobillərin intensiv istifadə etməsi vəziyyəti daha riskli edir.

Sakinlərin sözlərinə görə, güclü külək və ya digər amillər nəticəsində ağacın yıxılması ehtimalı var ki, bu da insanların təhlükəsizliyi baxımından ciddi problem yarada bilər.

Vətəndaşlar aidiyyəti qurumlara müraciət edərək problemin qısa müddətdə aradan qaldırılmasını xahiş edirlər.

Sumqayit.tv spzügedən videonu təqdim edir: 
Sumqayit.tv xəbər verir ki, Sumqayıt şəhərində qəzalı vəziyyətdə olduğ... | TikTok

2-03-2026, 19:49 160