Sumqayıt Dövlət Universitetində Ümumdünya Şəhərsalma Forumunun On Üçüncü Sessiyasına (WUF13) həsr olunmuş məlumatlandırma sessiyası təşkil edilib.

Sumqayit.tv xəbər verir ki, tədbir ölkə ictimaiyyətinin WUF13 barədə məlumatlandırılması məqsədilə keçirilib və sessiyada universitetin müəllim və tələbələri iştirak ediblər.

Tədbirdə çıxış edən Sumqayıt Şəhər İcra Hakimiyyətinin İctimai-siyasi və humanitar məsələlər sektorunun müdiri Fərman Kazımov şəhərin yaranma tarixindən, son illərdə keçdiyi inkişaf mərhələlərindən və şəhərsalma sahəsində həyata keçirilən yeniliklərdən danışıb. O, WUF13 forumunun əhəmiyyətini xüsusi vurğulayıb.

Dövlət Şəhərsalma və Arxitektura Komitəsinin nümayəndəsi Ramiz İdrisoğlu isə Azərbaycanda şəhərsalma sahəsində görülən işlərdən bəhs edib. Bildirilib ki, işğaldan azad edilmiş ərazilərdə genişmiqyaslı yenidənqurma və müasir yaşayış məkanlarının yaradılması istiqamətində mühüm layihələr həyata keçirilir. Qeyd olunub ki, artıq 8 şəhərin baş planı və 101 kənd və qəsəbənin şəhərsalma əsaslandırılması təsdiqlənib.

WUF13 Azərbaycan Əməliyyat Şirkətinin kommunikasiya üzrə meneceri Emin Hüseynzadə forumun proqramı barədə ətraflı məlumat verərək müəllim və tələbələri tədbirə qoşulmağa dəvət edib. Onun sözlərinə görə, iştirakçılar forumda həm əyani, həm də onlayn formatda iştirak edə bilərlər.

Məlumata görə, WUF13 Festivalı çərçivəsində Göyərçin parkında ictimai proqram da təşkil olunub. Proqram zamanı dayanıqlı şəhər inkişafı, inklüziv şəhər mühiti və innovativ şəhər həlləri ilə bağlı müxtəlif təqdimatlar, maarifləndirici oyunlar və ictimai müzakirələr keçirilib.

Forumla bağlı ətraflı məlumatı www.wuf13.az saytından əldə etmək mümkündür.

13-05-2026, 16:20 220