Sumqayıt şəhərinin 9-cu mikrorayonunda yerləşən 25, 26 və 27 saylı binaların sakinləri yaşadıqları ərazidə məişət tullantıları konteynerlərinin yerləşdirilməsindən narazıdırlar.

Sumqayit.tv-yə daxil olan müraciətdə sakinlər iddia edirlər ki, əvvəllər başqa ərazidə yerləşən zibil konteynerləri sonradan binaların yaxınlığına, sakinlərin gündəlik istifadə etdiyi yolun kənarına köçürülüb.

Onların sözlərinə görə, konteynerlər uşaqların 26 nömrəli məktəbə gedib-gəldiyi yolun üzərində yerləşdirilib. Sakinlər bildirirlər ki, isti yay günlərində əraziyə yayılan kəskin qoxu səbəbindən həm küçədə hərəkət etmək, həm də evlərdə pəncərə açmaq çətinləşib.

Müraciətdə qeyd olunur ki, məsələ ilə bağlı 16 iyun tarixində aidiyyəti quruma müraciət edilib. Daha sonra kollektiv şəkildə yazılı ərizə təqdim olunaraq konteynerlərin əvvəlki yerinə qaytarılması tələb edilib.

Sakinlərin iddiasına görə, Mənzil-Kommunal İstismar Sahəsinin (MİS) nümayəndələri konteynerlərin bir həftə ərzində köçürüləcəyini bildirsələr də, aradan aylar keçməsinə baxmayaraq, problem hələ də həllini tapmayıb.

Onlar bildirirlər ki, sonradan yenidən MİS-ə müraciət etsələr də, müəssisə rəhbəri ilə görüşə bilməyiblər. Yalnız rəhbərin köməkçisi ilə görüş keçirilib və onlara konteynerlərin artıq həmin ərazidə qalacağı bildirilib.

Sakinlər hesab edirlər ki, tullantı konteynerlərinin yaşayış binalarının, məktəbə gedən yolun və piyadaların intensiv istifadə etdiyi ərazidə yerləşdirilməsi həm antisanitar vəziyyət yaradır, həm də ətraf mühitə mənfi təsir göstərir.

Vətəndaşlar aidiyyəti qurumlardan məsələni yerində araşdırmağı, konteynerlərin daha uyğun əraziyə köçürülməsini və yaranmış problemin qısa müddətdə aradan qaldırılmasını xahiş edirlər.

Qeyd: Xəbərdə yer alan məlumatlar sakinlərin iddialarına əsaslanır. Sumqayit.tv məsələ ilə bağlı aidiyyəti qurumun mövqeyini dərc etməyə hazırdır. Rəsmi açıqlama daxil olduğu təqdirdə material yenilənəcək.

6-08-2026, 11:53 119