Bu dəfə yazdığımız məqalə Sumqayıtın "Titanik”i kimi tanınan gəmi haqqındadır. Sözügedən gəmi "Nəriman Nərimanov” adlı neft daşıyan tanker idi.

Qısa tarixçə ilə davam edək. Məlumata görə, "Titanik”imiz bir müddət təyinatı üzrə fəaliyyət göstərib, istismar müddəti bitdiyində isə Xəzər Dənizi Gəmiçilik İdarəsi tərəfindən istifadədən çıxarılıb. Bəzi qaynaqlara görə, daha sonra, 1983-cü ildə gəmi 50 min rubla alınaraq şəhərimizə gətirilmişdir. Rekonstruksiya olunandan sonra, tanker restoran (kafe) kimi fəaliyyət göstərməyə başladı. Sonradan isə, gəminin qabaq və arxa hissəsinin çəkisi mərkəzi hissədən daha çox olduğundan, o, ortadan sınmışdır.

Şəhər sakinlərinin sevimli "Titanik”i 25 ildən çoxdur Sumqayıtda qalıb. Uşaq, gənc, yaşlı demədən hər kəs bu gəminin üstünə çıxaraq, burada balıq ovu ilə məşğul olurdular. Məşhur gəmi dənizkənarı bulvarın tikintisindən bir neçə il öncə ərazidən aparılıb.
(Mənbə: sumqayit24.az)