Sumqayıt şəhəri, 9-cu mikrorayonda "Şərq bazarı" kimi tanınan yer artıq 5 ildir ki, baxımsız vəziyyətdədir. Ərazi hasara alınsa da, içərisində yalnız köhnə bir tikili qalıb.

Məlumata görə, burada obyektləri sökülən 66 sahibkar, habelə ətrafda yaşayan sakinlər onlara göstərilən laqeyd münasibətdən şikayətçidirlər.
Bildirilir ki, 2017-ci ilin may ayında "Şərq bazarı sökülüb. Həmin ilin sentyabr ayında elə orada yeni bazar tikiləcəyi vədi verilib. Lakin ötən müddətdə ərazidə, belə demək mümkündürsə, daş üstə daş qoyulmayıb.
Şikayətçilər bazarın onlar üçün həm qiymət, həm də məkan baxımından əlverişli olduğunu bildirirlər.  Onlarınm sözlərinə görə, ərazinin abadlaşdırılması ilə bağlı şəhər rəhbərliyinə müraciət edilib.  Söküntüdən sonra onlara yeni obyektin tikilib veriləcəyinə dair zəmanət məktubu təqdim olunub. Amma heç bir iş görülməyib.
Məsələ ilə bağlı bazarın əsas sahibi Rəşid Babayev ilə əlaqə qurmaq cəhdimiz alınmadı.
Sumqayıt Şəhər İcra Hakimiyyətindən isə bildirilib ki, qeyd olunan ərazidəki "Şərq bazarı"nın sahibi ilə 66 sahibkar arasında torpaqla bağlı mübahisəli məsələ var. Ərazidə tikinti işlərinin aparılması üçün sahibkarlar arasında ümumi razılıq olmalıdır. Sumqayıt Şəhər İcra Hakimiyyəti layihə əsasında tikinti işlərinin aparılmasına razılıq verib, heç bir etirazı yoxdur. Lakin tikinti işlərinin aparılması üçün sahibkarlar və bazar rəhbərliyi öz aralarında razılığa gəlməlidir.
Xezerxeber.az mövzu ilə bağlı daha ətraflı videomaterialı təqdim edir: