Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən ölkəmizdə ilk dəfə keçirilən "Peşələr festivalı”na başlanılıb və festivala Şamaxı rayonunda start verilib. Ölkənin 10 rayon və şəhərində "Öyrən, Əylən, Peşəni seç” devizi ilə, müxtəlif peşələr üzrə eksperlərin iştirakı ilə keçirilən festivalda iştirakçılar peşələr üzrə hansı bacarıqların tələb olunduğunu öyrənəcək. 
Layihə çərcivəsində aşpaz, dərzi, bərbər-vizajist, frontend developer, qrafik dizayner, interyer dizayner, kompüter proqram təminatı, barista, turizm agenti, elektron cihazların təmiri peşələri üzrə peşəkar ekspertlər tərəfindən təqdimat və vorkşoplar keçirilir. Gənclər peşə sahələri üzrə inkişaf etməyin yolları, gələcəkdə əmək bazarının necə formalaşacağı və peşələr üzrə hansı bacarıqların tələb olunacağı barədə məlumatlar, peşələrlə əyani şəkildə tanış olmaq imkanı əldə edəcəklər.
Festivalın növbəti mərhələsi bu gün - 17 may 2022-ci il tarixində Sumqayıt şəhərində, "Göyərçin” abidəsinin yanında keçiriləcək. Festivalda iştirak ödənişsizdir.
Öyrən, əylən, peşəni seç!
Ətraflı məlumat üçün: https://peshelerfestivali.az/