Karantin rejimi ilə əlaqədar müvafiq strukturlar tərəfindən toylarda yoxlamalar davam etdirilir.

Sumqayıt şəhərində fəaliyyət göstərən "Dan ulduzu " şadlıq sarayında keçirilən baxış zamanı pandemiya dövrünün tələblərinin kobud şəkildə pozulduğu aşkar olunub. 
Sumqayıt.tv-in xəbərinə görə, bu barədə Qida Təhlükəsizliyi Agentliyinin məlumatında bildirilir. Baxış zamanı şənlik mərasiminin icazə olunan 150 nəfərdən artıq şəxsin iştirakı üçün nəzərdə tutulduğu, xidmət göstərən işçi heyətin bəzilərinin tibbi maskalardan, əlcəklərdən və digər fərdi qoruyucu vasitələrdən istifadə etmədiyi məlum olub. Müəssisənin rəhbərliyi inzibati məsuliyyətə cəlb olunub.

Eyni zamanda, Lənkəranda COVID-19 pasportu olmayan 378 nəfər toylara buraxılmayıb. Daxili İşlər Nazirliyinin Mətbuat Xidmətinin Lənkəran regional qrupundan verilən məlumata görə, Lənkəranda son iki gün ərzində 378 şəxs “COVID-19” pasportu olmadığına görə toy məclislərinə buraxılmayıb.
Həmçinin bildirilir ki, Saatlı rayonunda Mustafabəyli kənd sakini E.Nərimanovun təyin olunmuş qaydaları pozaraq evinin həyətində 68 nəfər qonağın iştirakı ilə toy məclisi keçirdiyi müəyyən olunub. Aşkarlanan qayda pozuntusu ilə bağlı ev sahibi ilə profilaktiki söhbətlər aparılıb və mövcud qaydalara ciddi riayət etməsi tapşırılıb.
Qeyd edək ki, ötən gün 2 476 nəfər COVID-19 pasportu olmadığına görə toy şənliklərinə buraxılmayıb.