Fövqəladə Hallar Nazirliyinin Sumqayıt Regional Mərkəzi əhatə etdiyi ərazi üzrə şəhər və rayonların ümumtəhsil müəssisələrinin 2, 5 və 6-cı sinif rəhbərləri üçün mülki müdafiə kursları keçirib.
Nazirlikdən Sumqayit.tv-yə verilən xəbərə görə, keçirilən tədbirdə FHN Sumqayıt Regional Mərkəzi, Elm və Təhsil Nazirliyi Abşeron-Xızı Regional Təhsil İdarəsinin əməkdaşları, ümumtəhsil məktəblərinin müəllimləri iştirak ediblər.
Mülki müdafiə kurslarının keçirilməsində məqsəd məktəblərdə mülki müdafiəni tədris edən sinif rəhbərlərinin bu sahə üzrə bilik və bacarıqlarının artırılması olub.
Mülki müdafiə kurslarında iştirak edən dinləyicilərə fərdi mühafizə vasitələrindən istifadə, təbii və texnogen xarakterli fövqəladə hadisələr zamanı düzgün davranış, təxliyyə planlarının hazırlanması qaydaları, mülki müdafiə, yanğın və texniki təhlükəsizlik tədbirləri haqqında ətraflı məlumatlar verilib, mövzularla bağlı hazırlanmış fotoslayd və videoçarxlar nümayiş olunub.
Sonda tədbir iştirakçılarını maraqlandıran suallar cavablandırılıb.