Bu gün Dövlət İmtahan Mərkəzi (DİM) tədrisi Azərbaycan dilindən fərqli dildə aparılan məktəblərin 9 və 11-ci sinif şagirdləri üçün Azərbaycan dili (dövlət dili kimi) imtahanı keçirir. Eyni zamanda, əvvəlki illərin məzunları üçün də bu imtahan təşkil olunur.

Sumqayit.tv-yə DİM-dən verilən məlumata görə, imtahan 21 şəhər və rayonda, o cümlədən Sumqayıtda 1087 nəfərin iştirakı ilə, ümumilikdə 118 binada keçirilir. Bütün binalarda imtahan saat 10:00-da başlanır, saat 09:45-dən sonra gələnlər binaya buraxılmır.

İştirakçılar buraxılış vərəqəsi və şəxsiyyəti təsdiq edən sənədlə gəlməlidirlər. Şəxsiyyət vəsiqəsi olmayanlar üçün fotoşəkilli arayış da keçərlidir.

İmtahanda 30 tapşırıq təqdim olunur:

• Dinləyib-anlama – 1 mətn, 4 tapşırıq

• Dil qaydaları – 10 qapalı tipli sual

• Oxuyub-anlama – 2 mətn, hər birinə 8 tapşırıq

İmtahan 1 saat 30 dəqiqə davam edir. Maksimum bal – 100. 50 və daha yuxarı bal toplayanlar "məqbul" sayılır. Əvvəlki illərin abituriyentləri üçün isə maksimum 30 baldır, minimum 15 bal "məqbul" üçün kifayətdir.

İmtahanın təşkili üçün ümumilikdə 315 rəhbər, 2534 nəzarətçi, 363 mühafizəçi cəlb olunub. Sumqayıt da daxil olmaqla 53 sağlamlıq imkanları məhdud şagird üçün xüsusi şərait yaradılıb.