2024–2025-ci tədris ilində qəbul imtahanlarında 650-dən yuxarı bal toplayan Sumqayıt məktəblərinin 69 məzunu ilə görüş keçirilib.

Sumqayit.tv xəbər verir ki, tədbir Dövlət Dram Teatrında baş tutub. Görüşdə icra başçısı Zakir Fərəcov, Abşeron-Xızı Regional Təhsil İdarəsinin müdiri İlhamə Abdullayeva, müəllimlər və yüksək bal toplayan tələbələr iştirak ediblər.

İ. Abdullayeva bildirib ki, ötən tədris ilində şəhər üzrə 4 467 şagird məzun olub, onlardan 2 786 nəfəri universitetlərə qəbul olunub. Ümumilikdə 194 məzun 600-dən yuxarı nəticə göstərib, onların arasında 23 nəfər 670-dən, 11 nəfər isə 680-dən yuxarı bal toplayıb.

Çıxış edən Zakir Fərəcov təhsil sahəsində görülən işlərdən danışaraq, son illərdə məktəblərin əsaslı təmiri, yeni binaların inşası və müasir avadanlıqlarla təchizatını vurğulayıb. O, gəncləri təbrik edib, gələcək uğurlar arzulayıb.

Sonda yüksək nəticə göstərən məzunlara qiymətli hədiyyələr təqdim olunub.