Mayın 21-də Tofiq İsmayılov adına 6 nömrəli məktəb-liseydə ümumi təhsil müəssisələrinin IX-XI sinif şagirdləri arasında keçirilən “Zəkaların mübarizəsi II” olimpiadasının final mərhələsi baş tutub.
Sumqayit.tv xəbər verir ki, Heydər Əliyev Fondu və Elm və Təhsil Nazirliyinin birgə layihəsi olan olimpiada ümummilli lider Heydər Əliyevin anadan olmasının 103-cü ildönümünə həsr olunub.
Tədbirdə əvvəlcə Dövlət Himni səsləndirilib, daha sonra ümummilli lider Heydər Əliyevin və Azərbaycanın ərazi bütövlüyü uğrunda şəhid olmuş qəhrəmanların xatirəsi bir dəqiqəlik sükutla yad edilib.
Final mərhələsi bilik yarışı və şahmat turniri formatında təşkil olunub. Şahmat turnirində Sumqayıt şəhərinin komandası da digər regionlarla birlikdə mübarizə aparıb.
Təhsil İnstitutunun direktor müavini Fuad Qarayev çıxışında bildirib ki, layihənin əsas məqsədi gənclərdə strateji düşüncə, liderlik və düzgün qərarvermə bacarıqlarının inkişaf etdirilməsidir.
Elm və təhsil nazirinin müavini Firudin Qurbanov isə qeyd edib ki, bu cür intellektual yarışlar şagirdlərin yaradıcı düşüncə və komanda ilə işləmək bacarıqlarının formalaşmasına mühüm töhfə verir.
Bildirilib ki, olimpiadada ümumilikdə 5 mindən çox şagird iştirak edib. Yarışın yekununda qalib komandalar müəyyənləşdirilərək mükafatlandırılıblar.// AZƏRTAC
21-05-2026, 16:52
93
