2026-2027-ci tədris ili üzrə Bakı şəhəri və ölkənin müxtəlif bölgələrində fəaliyyət göstərən bir sıra lisey və gimnaziyaların 7-ci sinfinə qəbul prosesi başlayır.
Sumqayit.tv xəbər verir ki, Təhsil İnstitutunun yaydığı məlumata görə, şagird qəbulu mərkəzləşdirilmiş imtahan əsasında həyata keçiriləcək. Qeydiyyat müddəti 9-19 iyun tarixlərini əhatə edəcək.
Valideynlər və ya qanuni nümayəndələr qeydiyyatdan keçmək üçün şəxsi kabinetlərində "Sorğu yerləşdir" bölməsinə daxil olaraq əvvəlcə "Mərkəzi imtahanla qəbul" düyməsini seçməli, daha sonra imtahan keçiriləcək mərkəzi və digər məlumatları qeyd etməlidirlər.
Qeyd edək ki, lisey və gimnaziyalara qəbul ildə bir dəfə, tədris ili başlamazdan əvvəl "Şagirdlərin elektron yerdəyişməsi" (sy.edu.az) sistemi vasitəsilə qeydiyyatdan keçmiş və imtahanda iştirak hüququ qazanmış şagirdlər üçün təşkil olunur.
İmtahan zamanı şagirdlərə tədris dili və riyazi təfəkkürü ölçən müxtəlif tipli suallar təqdim ediləcək. Müvafiq keçid balını toplayan şagirdlər seçim mərhələsinə buraxılacaqlar.
Mərkəzləşdirilmiş qəbul aparılacaq təhsil müəssisələri arasında Sumqayıt şəhərinin Nizami Gəncəvi adına Texniki və Təbiət elmləri liseyi, "Təfəkkür" liseyi, Təbiət elmləri təmayüllü gimnaziya və humanitar və təbiət-riyaziyyat təmayüllü "İstedad" liseyi də yer alır.
Hər bir təhsil müəssisəsi barədə ətraflı məlumatı "Şagirdlərin elektron yerdəyişməsi" portalının "Mərkəzi imtahanlı liseylər" bölməsindən əldə etmək mümkündür.
Sumqayit.tv
8-06-2026, 18:24
193
