İyulun 12-də keçiriləcək I və IV ixtisas qrupları üzrə ali təhsil müəssisələrinə qəbul imtahanında iştirak edəcək abituriyentlər artıq imtahana buraxılış vərəqələrini əldə edə bilərlər.

Sumqayit.tv xəbər verir ki, bu barədə Dövlət İmtahan Mərkəzi (DİM) məlumat yayıb.

Məlumata görə, həmin gün III ixtisas qrupunun həm DT, həm də TC altqruplarını seçən abituriyentlər üçün coğrafiya fənni üzrə əlavə imtahan da təşkil olunacaq.

Buraxılış vərəqələrini DİM-in rəsmi internet səhifəsi, my.gov.az portalı və ya "myGov" mobil tətbiqi vasitəsilə çap etmək mümkündür. Vərəqədə imtahanın keçiriləcəyi bina, zal, tarix, başlanma vaxtı və iştirakçının imtahan binasına gəlməli olduğu saat göstərilib.

DİM xatırladıb ki, abituriyentlər imtahana buraxılış vərəqəsi və şəxsiyyəti təsdiq edən sənədin əslini təqdim etməlidirlər. Şəxsiyyət vəsiqəsində fotoşəkli olmayan iştirakçılar isə təhsil müəssisəsi tərəfindən verilmiş, fotoşəkilli və möhürlə təsdiqlənmiş arayışı da özləri ilə gətirməlidirlər.

Qeyd edək ki, imtahanlar saat 10:00-da başlayacaq. 09:45-dən sonra imtahan binasına gələn iştirakçılar imtahana buraxılmayacaqlar. DİM abituriyentlərə buraxılış vərəqəsində göstərilən vaxtda imtahan binasına gəlməyi tövsiyə edir.

2-07-2026, 12:09 53