Müəllimlərin işə qəbulu (MİQ) üzrə müsabiqənin test imtahanı mərhələsinə iyulun 14-dən start veriləcək.

Sumqayit.tv xəbər verir ki, bu barədə Məktəbəqədər və Ümumi Təhsil üzrə Dövlət Agentliyinin İmtahan və qiymətləndirmə şöbəsinin müdiri Nurlan İsmayılbəyli məlumat verib.

Onun sözlərinə görə, imtahanların keçirilməsi üçün ölkənin 23 şəhərində yerləşən 56 imtahan mərkəzi tam hazır vəziyyətə gətirilib.

Bildirilib ki, 2026–2027-ci tədris ili üzrə keçirilən müsabiqənin elektron sənəd qəbulu mərhələsində 46 505 müraciət daxil olub. Onlardan 40 574 namizəd ərizəsini təsdiqləyib, 38 651 nəfərin müraciəti isə qəbul edilib.

Qanunvericiliyə uyğun olaraq 9 857 namizəd iştirak haqqının ödənilməsindən azad edilib. Digər namizədlər üçün ödəniş prosesi iyulun 6–9-u tarixlərində həyata keçirilib. Hazırkı statistikaya əsasən, ödəniş etməli olan namizədlərdən 21 050 nəfər iştirak haqqını ödəyərək müsabiqədə iştirakını təsdiqləyib.

Qeyd edək ki, bu il ilk dəfə olaraq müəllimlərin işə qəbulu müsabiqəsi ödənişli əsaslarla təşkil olunur. İlk dəfə iştirak edən namizədlər, şəhid ailələrinin üzvləri, müharibə veteranları, əlilliyi olan şəxslər və ünvanlı dövlət sosial yardımı alan ailələrin üzvləri isə ödənişdən azad ediliblər.

Agentlikdən bildirilib ki, bu həftə ərzində namizədlərin şəxsi kabinetlərinə imtahanın keçiriləcəyi tarix, saat və məkan barədə məlumat göndəriləcək.

9-07-2026, 15:57 104