Məktəbəqədər təhsil müəssisələrinə elektron qəbul prosesi davam edir. Bu il qəbul prosesində valideyn-dövlət-özəl əməkdaşlığına əsaslanan yeni maliyyələşmə modelinin tətbiqi əsas yeniliklərdən biri hesab olunur.

Sumqayit.tv xəbər verir ki, Elm və Təhsil Nazirliyinin məlumatına görə, yeni model çərçivəsində övladını özəl uşaq bağçasına yerləşdirən valideynlərə müəyyən qaydalar əsasında dövlət tərəfindən maliyyə dəstəyi göstəriləcək. Bu dəstək aylıq təhsil haqqının bir hissəsinin dövlət büdcəsi hesabına ödənilməsini nəzərdə tutur.

Məktəbəqədər və Ümumi Təhsil üzrə Dövlət Agentliyinin (MÜTDA) məlumatına əsasən, 2025–2026-cı tədris ilində ümumi tutumu 1 384 yer olan 13 yeni məktəbəqədər təhsil müəssisəsi istifadəyə verilib. Bu il ölkə üzrə 1 671 dövlət bağçasında fəaliyyət göstərən 6 605 qrup üzrə qəbulun aparılması planlaşdırılır.

Agentlik bildirir ki, Bakı, Sumqayıt və Abşeron kimi əhalinin sıx məskunlaşdığı ərazilərdə bağçalara qəbul zamanı yer çatışmazlığı müşahidə olunur. Problemin aradan qaldırılması məqsədilə icma əsaslı məktəbəqədər təhsil qrupları, ailə tipli təlim qrupları və dövlət-özəl tərəfdaşlığı layihələri tətbiq edilir.

Təhsil eksperti İlqar Orucovun sözlərinə görə, elektron qəbul sistemi şəffaflığı artırsa da, infrastrukturun mövcud tələbatı tam ödəməməsi əsas problemlərdən biri olaraq qalır. Ekspert hesab edir ki, xüsusilə Bakı, Sumqayıt və Gəncə şəhərlərində dövlət bağçalarında yer çatışmazlığı daha qabarıq hiss olunur.

Mütəxəssislər bildirirlər ki, dövlət bağçalarında yerlərin məhdud olması səbəbindən bir çox valideyn özəl bağçalara üz tutur. Lakin özəl məktəbəqədər təhsil müəssisələrində aylıq ödənişlər əsasən 350–400 manatdan başlayır, əlavə xidmətlərdən asılı olaraq 700–1000 manata, bəzi hallarda isə daha yüksək məbləğlərə çatır. Bu isə bir çox ailə üçün əlçatan hesab edilmir.

12-07-2026, 14:47 45