İnternat məktəblərinin məzunları üçün peşə təhsili imkanları genişlənir.

Sumqayit.tv xəbər verir ki, internat məktəblərinin və xüsusi qayğıya ehtiyacı olan uşaqların gələcəkdə peşə təhsilinə cəlb olunması istiqamətində yeni layihə hazırlanır. Bu barədə Peşə Təhsili üzrə Dövlət Agentliyinin direktoru İlqar Bayramlı keçirilən brifinqdə məlumat verib.

Onun sözlərinə görə, layihənin əsas məqsədi internat məktəblərinin məzunlarının və xüsusi qayğıya ehtiyacı olan uşaqların məşğulluğuna dəstək vermək, onların peşə bacarıqlarını inkişaf etdirmək və əmək bazarına uğurlu inteqrasiyasını təmin etməkdir.

"Bu çərçivədə iştirakçılar müxtəlif peşə məşğələlərinə cəlb olunacaq və praktiki bacarıqlar əldə edəcəklər", – deyə İlqar Bayramlı bildirib.

Qeyd edək ki, layihənin həyata keçirilməsi peşə təhsilinə əlçatanlığın artırılması ilə yanaşı, həssas qruplardan olan gənclərin əmək bazarında daha fəal iştirakına da töhfə verməyi hədəfləyir.

23-07-2026, 14:34 75