Sumqayıt Dövlət Universitetinin rektoru, texnika elmləri doktoru, professor Nurəli Yusifbəyli qəbul imtahanlarında II və III ixtisas qrupları üzrə ölkə üzrə ən yüksək nəticə göstərən sumqayıtlı abituriyentlərlə görüşüb.
Sumqayit.tv xəbər verir ki, rektor gəncləri təbrik edərək onların uğurunu Azərbaycanın təhsil sisteminin inkişafının, eləcə də bilik, zəhmət və əzmkarlığın bariz nümunəsi kimi qiymətləndirib.
Nurəli Yusifbəyli bildirib ki, ali təhsilin əsas məqsədi yalnız diplom qazanmaq deyil, peşəkar bacarıqlara malik, yüksək mənəvi keyfiyyətlərə sahib və cəmiyyət qarşısında məsuliyyətini dərk edən vətəndaş yetişdirməkdir. O, müasir əmək bazarında nəzəri biliklərlə yanaşı liderlik, təşəbbüskarlıq, ünsiyyət və komanda ilə işləmək bacarıqlarının da mühüm rol oynadığını vurğulayıb.
Görüşdə yüksək nəticələrin əldə olunmasında əməyi olan müəllimlərə və valideynlərə də təşəkkür edilib.
Qeyd edək ki, bu il Sumqayıt şəhəri və Saray qəsəbəsindən olan abituriyentlər qəbul imtahanlarında ölkə üzrə ən yüksək nəticə göstərənlər sırasında yer alıblar.
Belə ki, Sumqayıt şəhər 35 nömrəli tam orta məktəbin məzunu Zamin Kərimov II ixtisas qrupu üzrə 690 bal toplayaraq ölkə birincisi olub.
III ixtisas qrupu üzrə isə Sumqayıt şəhəri Təbiət Elmləri Təmayüllü Gimnaziyanın məzunu Əli Məmmədzadə qəbul imtahanının ikinci mərhələsində maksimum 400 bal, ümumilikdə isə 689,6 bal toplayaraq ən yüksək nəticəni göstərib. Saray qəsəbə 1 nömrəli tam orta məktəbin məzunu Orxan Mənsimli də ikinci mərhələdə 400 bal toplayaraq yüksək nəticə göstərən abituriyentlər sırasında yer alıb.
25-07-2026, 10:50
83
