Yeni tədris ilinin başlanmasına sayılı günlər qalıb. Valideynlər artıq övladlarını məktəbə hazırlamaq üçün zəruri ləvazimatların alışına başlayıblar.

Sumqayit.tv xəbər verir ki, məktəbli çantası, forma, dəftərxana ləvazimatları və digər məhsulların qiymətləri məhsulun keyfiyyətinə və istehsalçı ölkəsinə görə dəyişir.

Bakı və Sumqayıtda aparılan müşahidələrə əsasən, bəzi məhsulların qiymətlərində fərqlər var. Sumqayıtda bir sıra mağazalarda məktəb ləvazimatlarına endirimlər də tətbiq olunur.

Dəftərlərin qiymətləri

Sumqayıtda 40 vərəqli dəftər 25 qəpik, 60 vərəqli dəftər 35 qəpik, 100 vərəqli dəftər isə 55 qəpiyə satılır.

12 vərəqli enli xətli dəftərin qiyməti 15 qəpik, 24 vərəqli 25 qəpik, 48 vərəqli 40 qəpik, 60 vərəqli 55 qəpik, 96 vərəqli dəftər isə 75 qəpikdir.

Bakıda 48 vərəqli dəftər 80 qəpik, 24 vərəqli dəftər 50 qəpikdir. 30 vərəqli dəftərin qiyməti isə 30 qəpikdən başlayır.

Spirallı A4 ölçülü böyük dəftərlər 2 manat 5 qəpik, 240 vərəqli riyaziyyat dəftəri isə 6 manatdır.

Digər məktəb ləvazimatlarının qiymətləri

Albomlar 50 qəpikdən 5 manatadək, yapışqanlar 30 qəpikdən 2 manatadək, ağardıcılar 40–95 qəpik, qələmlər 15 qəpikdən 2 manatadək təklif olunur.

Rəngli karandaşların qiyməti 1 manat 70 qəpikdən 7 manatadək, plastilinlər 5–7 manat, flomasterlər 90 qəpikdən 11 manatadək dəyişir.

Su qablarının qiyməti 3–25 manat, qələm və karandaş qablarının qiyməti isə 2–8 manat arasında dəyişir.

Məktəbli çantaları neçəyədir?

Məktəbli çantalarının qiyməti istehsalçı ölkə və məhsulun xüsusiyyətlərindən asılı olaraq dəyişir. Hazırda mağazalarda əsasən Türkiyə və Çin istehsalı çantalara rast gəlinir.

Çantaların qiyməti 10 manatdan başlayaraq 120 manatadək yüksəlir. Türkiyə istehsalı çantalar əsasən 30–65 manat, daha keyfiyyətli Çin istehsalı çantalar isə təxminən 60 manat civarında satılır.

Təkərli məktəbli çantalarının qiyməti isə 120 manatadək çatır.

Sumqayıtda endirimlər tətbiq olunur

Məlumata görə, Sumqayıt şəhərində bəzi məktəbli mağazalarında iyulun 22-dən etibarən bir sıra ləvazimatlara endirimlər tətbiq edilir. Endirimlərin sentyabrın 30-dək davam edəcəyi bildirilir.

Qeyd olunur ki, endirimli qiymətlər yalnız nağd alış zamanı keçərlidir. Bəzi məhsullarda endirim məbləği 20 qəpikdən 1 manatadək dəyişir.

Məktəbli formalarının qiymətlərində isə dəyişiklik olmadığı, ötən ildən tətbiq edilən endirimlərin qüvvədə qaldığı bildirilib.

Beləliklə, yeni tədris ili ərəfəsində məktəb alış-verişinə xərclənəcək məbləğ seçilən məhsulların sayından, keyfiyyətindən və qiymətindən asılı olaraq dəyişir. Sumqayıtda bəzi mağazalarda tətbiq olunan endirimlər isə valideynlər üçün alış-verişi nisbətən daha sərfəli edə bilər.//Oxu.az

18-08-2026, 23:16 70