Xaçmaz rayonunun Niyazabad kəndindən olan əkiz bacılar Selcan və Nurcan Əkbərova bu il ali məktəbə qəbul olaraq eyni ixtisası seçiblər.

Sumqayit.tv xəbər verir ki, bacılar 2015-ci ildə Niyazabad kənd tam orta məktəbinin birinci sinfinə gedib, bütün təhsil müddətində eyni sinifdə oxuyublar. Bu il isə məktəbi birlikdə başa vurublar.

Qəbul imtahanlarında II ixtisas qrupu üzrə iştirak edən Selcan 322 bal, Nurcan isə 317 bal toplayıb.

Əkiz bacıların hər ikisi Sumqayıt Dövlət Universitetinin Sosiologiya ixtisasına qəbul olub.

Onların anası Rəna Əkbərova bu nəticənin ailə üçün böyük sevinc olduğunu bildirib. Onun sözlərinə görə, bacılar birinci sinifdən etibarən birlikdə təhsil alıb, bir-birlərinə həm bacı, həm də yaxın rəfiqə olublar.

Beləliklə, Selcan və Nurcan bundan sonra da təhsil yollarını birlikdə davam etdirəcək, eyni universitetdə və eyni ixtisasda tələbə olacaqlar.

Qeyd edək ki, ailədə dörd övlad var. Əkiz bacılar ailənin sonbeşikləridir. Onların anası xalçaçı, atası isə balıqçıdır.//Azərtac

25-08-2026, 22:50 39