Tehrandakı səfirliyimizdə terror törətmiş şəxsi məsuliyyətdən yayındırmaq üçün İran rəsmi dairələri müxtəlif üsullara əl atır. Terrorçu Yasin Hüseynzadə psixiatriya xəstəxanasına yerləşdirilib.
Politoloq İlyas Hüseynov Globalinfo.az-a bildirib ki, səfirliyimizə qarşı cinayət əməlinin törədilməsindən bir neçə saat sonra İran polisinin verdiyi açıqlamalar həqiqətdən çox uzaq idi:
“Sanki bu cinayət ailə qarşıdurması, məişət zəminində törədilmişdi. Lakin bu gün biz görürük ki, terrorçu Yasin Hüseynzadə psixiatriya xəstəxanasına yerləşdirilib. Bu onu deməyə əsas verir ki, Tehranda törədilmiş cinayətdə məsuliyyətdən yayınmaq üçün İranın rəsmi dairələri artıq ciddi tədbirlər görürlər. Onun ruhi xəstə olması ilə bağlı iddialar həm də gələcəkdə bu şəxsin bəraət alması, cəzalandırılmaması və ya yüngül formada dırnaqarası istirahətə göndərilməsi ilə nəticələnə bilər”.

İlyas Hüseynov
Ekspert vurğulayıb ki, bu baxımdan Azərbaycan tərəfi həm də istintaq prosesində yaxından iştirak etməlidir:
“Azərbaycan-İran təhqiqat qrupu yaradılmalı, bizim müstəntiqlər və hüquq-mühafizə orqanlarının əməkdaşları işə cəlb olunmalıdır. Bu istiqamətdə rəsmi Tehranla danışıqlar, yazışmalar həyata keçirilməlidir. Çünki bu sadəcə olaraq bir cinayət hadisəsi deyil. Bu, İran-Azərbaycan münasibətlərini dərindən sarsıdan, 30 illik diplomatik münasibətlərə son qoyan, səfirlik əməkdaşlarının təxliyə olunması, diplomatik yazışmaların, diplomatik kanalların öz işinin dayanması ilə nəticələnən cinayət hadisəsidir. Buna görə də həmin şəxsə hansısa imtiyazlar vermək, onu psixi xəstə adlandırmaq, cəmiyyətdən təcrid etmək kimi addımlar tamamilə yolverilməzdir.

Bu, terrorçunun arxasında duran qüvvələrin məkrli planlarıdır və istintaqın bəri başdan getməyəcəyinə bir işarədir.
Ona görə Azərbaycan tərəfi tələb edir ki, bu işə hüquqi zəmində qiymət verilsin və nəinki cinayətkar, eləcə də onun arxasında duran sifarişçilər qanun çərçivəsində öz payını alsınlar. Lakin psixi xəstə iddiasının irəli atılması birbaşa ona dəlalət edir ki, bu şəxsi himayə edirlər və onun arxasında qüvvələr var, rəsmi Tehran da bu işləri idarə edir”.