Azərbaycan ədəbiyyatının görkəmli nümayəndələrindən biri, şair Mikayıl Müşfiq 1908-ci il 5 iyun tarixində Bakı şəhərində ziyalı ailəsində dünyaya gəlib. Əslən Xızı rayonundandır. İlk təhsilini inqilabdan əvvəl rus-tatar məktəbində, daha sonra isə Bakı darül-müəllimində və II dərəcəli məktəbdə alıb. 1927–1931-ci illərdə Azərbaycan Dövlət Universitetinin dil və ədəbiyyat fakültəsini bitirib.

Əmək fəaliyyətinə müəllim kimi başlayan Müşfiq, Bakıdakı orta məktəblərdə yeddi il dərs deyib. Son çalışdığı 18 saylı məktəb bu gün onun adını daşıyır.

Şairlik fəaliyyətinə 1926-cı ildə “Gənc işçi” qəzetində çap olunan “Bir gün” şeiri ilə başlayıb. İlk şeirlər toplusu “Küləklər” 1930-cu ildə işıq üzü görüb. Bu illərdə o, həm də bədii tərcümə ilə məşğul olub – A.S.Puşkin, T.Şevçenko, Y.Çarens kimi yazıçıların əsərlərini dilimizə çevirib.

1931–1937-ci illərdə həyat yoldaşı Dilbər Axundzadə ilə birlikdə yaşayıb. Onun xatirələrindən ibarət “Müşfiqli günlərim” adlı kitab sonradan 2005-ci ildə genişləndirilmiş şəkildə yenidən çap olunub.

Mikayıl Müşfiq 1938-ci il 6 yanvarda repressiya dövründə güllələnib. Onun xatirəsi müxtəlif formalarda əbədiləşdirilib: Bakıdakı evinin önündə xatirə lövhəsi, adına məktəblər, küçələr və meydanlar var. “Yenə o bağ olaydı”, “Oxu, tar” kimi şeirləri bu gün də poeziyamızın dəyərli inciləri sırasındadır.

5-06-2025, 11:26 268