Bu gün Aprel döyüşlərinin qəhrəmanlarından biri, "Murov Qartalı" kimi tanınan şəhid polkovnik-leytenant Raquf Orucovun doğum günüdür. Yaşasaydı, qəhrəman zabit bu gün 54 yaşını qeyd edəcəkdi.
Sumqayit.tv xəbər verir ki, Azərbaycan Silahlı Qüvvələrinin polkovnik-leytenantı, Qarabağ müharibəsi qazisi Raquf Orucov 1972-ci il iyulun 12-də Ağdam rayonunun Cinli kəndində Raya və İbrahim Orucovun ailəsində anadan olub.
Ailənin ilk övladı olan Raquf Orucovun üç qardaşı və bir bacısı var idi. 1990-cı ildə sovet ordusunda hərbi xidmətə başlayan Raquf Orucov daha sonra Azərbaycan Ordusunun sıralarına qoşulub. Fərrux dağı və Aranzəmin istiqamətində gedən döyüşlər zamanı ayağından ağır qəlpə yarası alsa da, Vətənə xidmət yolundan dönməyib.
1993-cü ildə Ağdam rayonunun Cinli kəndinin işğalı zamanı anası Raya Orucova şəhid olub. Elə həmin il Bakı Ali Hərbi Ümumqoşun Komandirləri Məktəbinə sənəd versə də, bir il sonra həmin təhsil ocağına qəbul olunub. 1996-cı ildə məktəbi bitirdikdən sonra Bakıdakı hərbi hissələrdən birinə təyinat alsa da, ön cəbhədə xidmət etməyi seçərək Murovdağa yollanıb və kəşfiyyat bölüyünün komandiri kimi fəaliyyət göstərib.
2016-cı ilin Aprel döyüşləri zamanı polkovnik-leytenant Raquf Orucov son döyüşünə qatılıb. Vətənin müdafiəsi uğrunda qəhrəmancasına vuruşan zabit ömrünün 26 ilini hərbi xidmətə həsr etdikdən sonra şəhidlik zirvəsinə ucalıb.
Aprelin 5-də şəhid polkovnik-leytenant Raquf Orucov Sumqayıt şəhərində minlərlə insanın iştirakı ilə son mənzilə yola salınıb. Dəfn mərasimində Müdafiə Nazirliyinin rəhbər heyəti, döyüş yoldaşları, şəhid ailələri və şəhər sakinləri iştirak ediblər.
Bu gün doğum günündə "Murov Qartalı" Raquf Orucovun əziz xatirəsini dərin hörmət və ehtiramla yad edir, Azərbaycanın ərazi bütövlüyü və suverenliyi uğrunda canlarından keçmiş bütün şəhidlərimizə Allahdan rəhmət diləyirik. Onların göstərdiyi qəhrəmanlıq xalqımızın yaddaşında əbədi yaşayacaq.
12-07-2026, 05:49
51
