Bakı-Sumqayıt yolu heç bir standarta uyğun gəlməyən ən təhlükəli yollardan biridir. Son günlər bu yolda bir çox sərnişinin xəsarət aldığı avtobus qəzaları baş verib. Yol-nəqliyyat hadisələrinin sayının artmasında bir sıra amillər rol oynayır. Burada yol infrastrukturundan tutmuş sürücülərin davranışlarına qədər bir çox amilləri qeyd etmək olar. Təəssüf ki, bu tip avtobusların böyük əksəriyyəti bir neçə dəfə qəzaya düşdüyünə görə, təhülkəsizlik yastığı, ümumiyyətlə, işləmir. Qəza anında bu yastıqlar açılmır və insanı qorumur. Həmçinin, təhülkəsizlik kəmərindən çox az insan istifadə edir. Bütün bunlar son nəticədə ağır fəsadlara və ölüm hallarının sayının artmasına gətirib çıxarır.
Görəsən, Bakı-Sumqayıt yolunda sərnişin daşıyan fərdi avtobusların hərəkətinə necə nəzarət olunur? Onların idarə etdiyi maşınların texniki baxışdan keçirilirməsinə nəzarət edilirmi?        

 
Yol hərəkəti təhlükəsizliyi mütəxəssisi, sürücülük təlimçisi Arzu Kürsüm Babazadə Xeberle.com-a açıqlamasında deyib ki, təkcə sərnişin avtobuslarında deyil, məktəb sevisləri, beynəlxalq sərnişindaşıma və rayonlararası avtobuslarda da bu problem yaşanmaqdadır:

"Onsuzda texniki baxışdan keçməsələr cərimələnirlər. Bu baxımdan, məcburi texniki baxışdan keçirlər. Düzdür, ildə bir dəfə texniki baxışdan keçirilir. Amma bu kifayətdirmi? Avtobuslarda il ərzində bir çox nasazlıqlar yarana bilər. Bu cür nasazlıqlar da qəzaya gətirib çıxarır. Bundan əlavə sürücü təcrübəsi, məsuliyyəti, mədəniyyəti olması, psixoloji və narkoloji bağımlılığı olmaması önəmlidir. Mən hələ də Azərbaycanda sərnişinlərin təhlükəsizlik kəmərindən istifadə etdiyini görməmişəm. Bunu sərnişinlərdən sürücülər də tələb etmir. Reyd keçirilsə görərik ki, bəzi avtobuslarda sərnişinlər üçün təhlükəsizlik kəməri yoxdur, bəzilərində isə işləmir. Bu da ciddi problemdir. Ən pisi odur ki, sürücünün özü də təhlükəsizlik kəmərindən istifadə etmir. Peşəkar sürücülər bilir ki, sürücü kəmər taxmadığı zaman idarəetməni itirir. Yol-nəqliyyat hadisəsi zamanı ən pisi insanın əlil qalması və ya azadlıqdan məhrum olmasıdır. Bacardıqca diqqətimiz avtomobildə olmalıdır. Onu da qeyd edək ki, ictimai nəqliyyatda sürücülər mobil telefonlardan istifadə edir. Bəzi sürücülər hətta tik-tok sosial şəbəkəsində canlı yayım da açır. Bu cür halların baş verməsi yolverilməzdir və fikri yayındırır. Bu cür sürücləri cərimələmək lazımdır”. 

 
Məsələ ilə bağlı Azərbaycan Yerüstü Nəqliyyat Agentliyi ilə əlaqə saxladıq. Qurumdan Xeberle.com-a bildirilib ki, yayınma, marşrutdan kənarlaşma, sürət həddinin aşması aşkarlandıqda, daşıyıcılara bu barədə xəbərdarlıq edilir: "Azərbaycan Yerüstü Nəqliyyat Agentliyinin (AYNA) avtomatlaşdırılmış monitorinq sistemi vasitəsilə avtobusun hərəkəti izlənilir. Yayınma, marşrutdan kənarlaşma, sürət həddinin aşması aşkarlandıqda, daşıyıcılara bu barədə xəbərdarlıq edilir. Bu hallar təkrarlandıqda isə marşrut müsabiqəyə çıxarılır. AYNA tərəfindən müntəzəm sərnişindaşıma xidməti göstərən daşıyıcılara xəbərdarlıq olunaraq sərnişindaşıma qaydalarına riayət etmələrinə nəzarətin gücləndirilməsi barədə tapşırıqlar da verilir. Müntəzəm sərnişindaşımanı həyata keçirən avtobuslar gündəlik reysqabağı texniki baxışdan keçirilir, sürücülər isə tibbi müayinəyə cəlb olunurlar”.
Elşən Yəhyayev