Azərbaycan xalqı dünyanın ən qədim dövlətçilik ənənələrinə malik olan xalqlarından biridir. Təqribən 5 min illik dövlətçilik tarixinə malik olan Azərbaycan öz mədəniyyətinin, adət-ənənələrinin, ədəbiyyatının, elm və təhsilinin tərəqqisindəböyük nailiyyətlərə imza atıb. Hər bir milləti tanıdan və onu digər xalqlardan fərqləndirən ən vacib xüsusiyyətlərindən biri onun yüksək mənəvi dəyərlər sisteminə malik olmasıdır. Azərbaycan bütün tarixi dövrlərdəbəşər mədəniyyətinə əvəzsiz töhfələr vermişdir.
28 may 1918-ci ildə Azərbaycan Xalq Cümhuriyyətinin yaradılması ilə tariximizdə yeni bir səhifənin başlanğıcı qoyuldu. İstiqlal Bəyannaməsininelan edilməsi xalqımızın müstəqil dövlətə sahib olmaq iradəsinin təntənəsi idi. Azad, demokratik respublika qurmaq məqsədini qarşıya qoyan Azərbaycan Xalq Cümhuriyyətinin qurucuları yeni fəaliyyətə başlamış parlamentin qəbul etdiyi qanunlar milli müstəqilliyin möhkəmləndirilməsində, ölkədə siyasi, iqtisadi və mədəni inkişafın təmin olunmasında, habelə, demokratik prinsiplərin təsbit edilməsində əsaslı rol oynadı. 
Azərbaycan Xalq Cümhuriyyəti cəmi 23 ay yaşasa da, dövlətçiliyimizin bərpası baxımından müstəsna əhəmiyyətə malik oldu.28 aprel işğalı Azərbaycan Xalq Cümhuriyyətinin mövcudluğuna son qoysa da, azadlıqsevər xalqımız 18 oktyabr 1991-ci ildə öz dövlət müstəqilliyini yenidən bərpa etdi və bu dövlət müstəqilliyinin qorunub saxlanmasına, möhkəmləndirilməsinəUlu Öndər Heydər Əliyev əvəzsiz töhfələr verdi. Ulu Öndər 1918-ci ilin 28 mayında Azərbaycan Xalq Cümhuriyyətinin elan edilməsinin tarixi əhəmiyyətini son dərəcə yüksək qiymətləndirmişdir.
Ümummilli liderimiz Heydər Əliyevin “Müstəqilliyi qorumaq, saxlamaq o müstəqilliyi əldə etməkdən qat-qat çətin bir vəzifədir” fikirləri tarixin sınağından keçmiş hikmətli sözlərdir. Ulu Öndər Heydər Əliyev deyirdi: “Biz ilk Demokratik Cümhuriyyətin yaranması gününü əziz tutaraq, onu Azərbaycanın dövlət müstəqilliyi günü – Respublika Günü elan etmişik və bu, bizim milli bayramımızdır”.
Azərbaycan Xalq Cümhuriyyətinin yadigarı kimi Azərbaycan bayrağının bu gün artıq işğaldan azad olunmuş Şuşada dalğalanması Azərbaycan Prezidenti İlham Əliyevin gələcək nəsillərə unudulmaz dövlətçilik əmanətidir. Dövlət başçımız qeyd edir ki, Azərbaycan dövləti və xalqı Azərbaycan Xalq Cümhuriyyətinin qurucularının xatirəsini əziz tutur. Onların xatirəsi bizim qəlbimizdə yaşayır.
Müzəffər Ali Baş Komandan Cənab İlham Əliyevin rəhbərliyi ilə müstəqilliyimiz və dövlətçiliyimiz ötən hər gün daha da möhkəmlənir. 2021-ci il 15 oktyabr tarixində “Müstəqillik günü haqqında” Azərbaycan Respublikasının Qanunu qəbul olunmuşdur. Bu Qanun dövlətçilik ənənələrimizin əbədi yaşayacağını bir daha təsdiq edir.Ulu Öndər Heydər Əliyev tərəfindən qorunub saxlanılan müstəqilliyimiz bu gün Prezident İlham Əliyevin rəhbərliyi ilə daha da möhkəmləndirilir və onun əbədiliyi təmin edilir. Müzəffər Ali Baş Komandan Cənab İlham Əliyevin səsləndirdiyi “Müstəqilliyimiz əbədidir, dönməzdir, sarsılmazdır! Yaşasın güclü, müstəqil Azərbaycan!” ifadələri hər birimizi sonsuz qürurlandırır.

Vasif Səfiyarov
YAP Sumqayıt şəhər təşkilatının məsləhətçisi