Azərbaycan artıq üçüncü dəfədir ki, ECO-nun Zirvə görüşünə ev sahibliyi edir. Məlumdur ki, əvvəlki iki Zirvə görüşü 2006-cı və 2012-ci illərdə paytaxt Bakıda keçirilmişdir. 2025-ci il, iyulun 4-də Xankəndidə baş tutan İqtisadi Əməkdaşlıq Təşkilatının 17-ci Zirvə görüşü Azərbaycanın ən mühüm, ən əhəmiyyətli tədbirlərə ev sahibliyi etməsinin uğurlu təsdiqidir. Həmçinin qeyd edək ki, Azərbaycanın təşəbbüsü ilə bu il ilk dəfə ECO Həftəsi keçirildi. Şuşada ECO-nun Biznes Forumu, Ağdamda Gənclər Forumu, Laçında isə Qadınlar Forumu təşkil edildi və forumda iştirak etmiş nümayəndələr görülmüş işlərlə bağlı məruzələr səsləndirdilər.
İqtisadi Əməkdaşlıq Təşkilatının 17-ci Zirvə görüşünün 2025-ci il, iyulun 4-də Qarabağda, Xankəndidə təşkil edilməsinin xüsusi mənası var. Erməni işğalından sonra bütün Qarabağ və Şərqi Zəngəzurda genişmiqyaslı bərpa-quruculuq işləri aparılır. Azərbaycan haqq davası apararaq torpaqlarını erməni işğalından azad etmişdir. 2020-ci ildə 44 günlük Vətən müharibəsi zamanı Azərbaycan Ermənistanı döyüş meydanında darmadağın edərək 300-dən çox şəhər və kəndi azad etmiş və Ermənistan 2020-ci il noyabrın 10-da kapitulyasiya aktı imzalamağa məcbur olmuşdur. Bu gün artıq Qarabağdakı yurd yerlərimiz möhtəşəm tədbirlərin keçirilməsi üçün əlverişli ərazidən daha çox böyük mənəvi məkana çevrilir. Bura Turan birliyi, Turan quruculuğuna gedən yolun addımları atılır. Ən gözəl görüntü, ən nümunəvi model sərgilənir Qarabağda. İndi Azərbaycan Ermənistanın xarabazara çevirdiyi torpaqlarda yeni şəhərlər və kəndlər inşa edir. “Böyük Qayıdış” proqramı icra edilir. Bu günə qədər 16 şəhər və kəndə keçmiş məcburi köçkünlərin qayıdışını təmin etmişik. Hazırda azad edilmiş ərazilərdə 50 mindən çox insan yaşayır, çalışır və təhsil alır.
Ölkə başçısı, Azərbaycan Respublikasının Prezidenti cənab İlham Əliyev Xankəndidə keçirilən 17-ci Zirvə görüşündə bildirdi ki, “bizim ölkəmizdə çox müsbət sərmayə iqlimi vardır. Son 20 il ərzində Azərbaycan iqtisadiyyatına 350 milyard ABŞ dollarına yaxın sərmayə qoyulmuşdur ki, bunun da yarısı xarici sərmayədir. Bu gün Azərbaycan bir çox ölkələrin enerji təhlükəsizliyini təmin edir və müxtəlif qaz boru kəmərləri vasitəsilə 12 ölkəyə təbii qaz ixrac edir. Bu göstəriciyə görə biz dünyada ön sıralardayıq. Şərq-Qərb və Şimal-Cənub nəqliyyat dəhlizləri Azərbaycan ərazisindən keçir və ECO-ya üzv ölkələrin əksəriyyəti bu dəhlizlərdən istifadə edir”. Bütün bunlar çox mühüm göstəricilərdir və Azərbaycanın enerji bazasının nə qədər üstün olmasını sərgiləyir.
İyulun 4-də İqtisadi Əməkdaşlıq Təşkilatının 17-ci Zirvə görüşündə bir çox mühüm məsələlərlə yanaşı Ermənistandan deportasiya olunmuş Qərbi azərbaycanlıların hüquqlarının təmin olunması məqamı üzərində də dayanıldı. Bildirildi ki, Qərbi azərbaycanlıların Ermənistandakı öz dədə-baba torpağına sülh yolu ilə qayıdışının təmin edilməsi sahəsində səylər bundan sonra da davam etdiriləcək. Bütün bunlar bir daha təsdiqləyir ki, Prezident İlham Əliyev mövqeyində qəti və güzəştsizdir, heç bir halda haqlı olduğu məsələdə geri addım atmır, səbir, səriştə və möhkəm iradə ilə yolun sonuna uğurla çatmağı, qalibiyyət bayrağını ən uca zirvələrdə dalğalandırmağı bacarır.

ELNARƏ AKİMOVA
Milli Məclisin deputatı,
YAP İdarə Heyətinin üzvü,
filologiya elmləri doktoru